Медицина қызметкерлерінің кәсіби мерекесіне орай бүгін Нұр-Сұлтан қаласы “Алматы” ауданы әкімінің Бас инспекторы Нұрмат Абдраимов белгілі дәрігер, Халықаралық «Экология» Академиясының Академигі, ҚР халықтың денсаулығын сақтау ісіндегі ерекше еңбегі үшін жоғарғы медалінің иегері, “Тұғырылхан – Оң хан” корпоративтік қоры ақсақалдар кеңесі төрағасының орынбасары Толқын Ақанұлымен кездесті.
Кездесу барысында еліміздегі коронавирус індетінің таралу жағдайы, Қазақстан Президенті Қасым-Жомарт Тоқаев пен Үкімет тарапынан індетпен күресу мақсатында іске асырылып жатқан шаралар, ел азаматтарының пандемияға қарсы тұрудағы бірлігі мен ұйымшылдығы, осы жолдағы медицина қызметкерлерінің ерен еңбегі турасында әңгіме өрбіді.
Сөз соңында Нұрмат Абдраимов Әкімдік атынан Толқын Ақанұлын кәсіби мерекесімен құттықтап, зор денсаулық, еңбекте табыс тіледі.
Толқын Ақанұлы дәрігердің еңбегін елеп-ескеріп, қолдау көрсеткен әкімдік қызметкерлеріне ризашылық білдірді. Сондай-ақ, мыңға жуық медициналық бетперде, қолғап, сонымен қатар, коронавирустан қалай сақтану керектігі туралы жазылған үгіт-насихат қағаздарын тарту етті.
Еске салсақ, Қазақстанда жыл сайын маусым айының үшінші жексенбісінде медицина қызметкерлері күні атап өтіледі. Сондай-ақ, Мемлекет басшысы медицина қызметкерлерін кәсіби мерекелерімен құттықтаған болатын.